Ferrol converterase a finais de outubro nun punto de encontro para reflexionar sobre as transformacións que está experimentando a orde internacional e sobre o papel que Galicia pode desempeñar nas relacións entre Oriente e Occidente. O Campus Industrial de Ferrol e o Instituto Galego de Análise e Documentación Internacional (IGADI) celebrarán o mércores 28 de outubro a cuarta edición das xornadas ‘Ferrol no Mundo do Século XXI’.
A Facultade de Humanidades e Documentación acollerá desde as 16:00 horas unha tarde de debate dividida en tres mesas redondas nas que se abordarán cuestións como a nova gobernanza global, as relacións con China e Asia, as posibilidades de investimento e internacionalización ou o papel da cultura e da lingua no coñecemento mutuo.
A iniciativa, organizada coa colaboración do Observatorio da Política China (OPCh), está especialmente dirixida ao alumnado do grao en Relacións Internacionais que se imparte no Campus Industrial, aínda que estará aberta de maneira gratuíta ao conxunto da comunidade universitaria e á cidadanía ata completar o aforo.
Galicia ante un mundo no que Asia gaña protagonismo
Tras a apertura das xornadas, presentada polo xornalista Tino Santiago, a primeira mesa redonda comezará ás 16:30 horas baixo o título ‘Galicia e Ferrol ante a nova gobernanza global: Europa, China e Asia no século XXI’.
O debate contará con Francisco Cortizo Rodríguez, coordinador do grao en Relacións Internacionais da Universidad Francisco de Vitoria; Blanca Marbini San Martín, investigadora predoutoral no Centro de Estudios de Asia Oriental da Universidad Autónoma de Madrid, que participará en liña; e Christoph Schreinmoser, director do IGADI e profesor da Universidade da Coruña.
A vertente económica protagonizará a segunda mesa, prevista para as 17:30 horas. Baixo o título ‘Galicia e Asia: Investimento, Internacionalización e Novas Oportunidades Económicas’, analizaranse as posibilidades que o continente asiático pode representar para Galicia.
Participarán Diego Sande Veiga, secretario do IGADI, coordinador da súa liña de análise e investigación en Economía e profesor da Universidade de Santiago de Compostela, e Daniel González Palau, director adxunto do Observatorio da Política China.
A última mesa comezará ás 18:45 horas e trasladará a conversa máis alá das relacións económicas. ‘Máis alá da economía: cultura, lingua e coñecemento mutuo entre Galicia e Asia’ contará coa vicedirectora do IGADI e profesora de chinés na Escola Oficial de Idiomas de Vigo, Marola Padín Novas; a técnica superior en Comercio Internacional Peile Lin; e o xornalista e escritor Nicolás Vidal.
As persoas interesadas poderán asistir libremente ata completar o aforo e solicitar máis información a través do correo electrónico info@igadi.gal.
Un curso analiza desde Ferrol o papel das Nacións Unidas
As xornadas estarán precedidas durante este mes por outra iniciativa centrada nos cambios que atravesa o escenario internacional. A Facultade de Humanidades e Documentación acolle desde este mércores 7 de outubro o curso ‘As Nacións Unidas no Mundo do Século XXI: Gobernanza Global, Axenda 2030 e o Papel de Asia’.
A primeira sesión, ás 18:00 horas, estará impartida por Christoph Schreinmoser e abordará ‘O Sistema das Nacións Unidas nun Mundo Multipolar: O Papel do Sur Global’.
O programa continuará o 14 de outubro, á mesma hora, coa conferencia ‘Axenda 2030 e Gobernanza Global e Desenvolvemento Sustentable’, a cargo de Daniel González Palau.
A terceira e última sesión celebrarase o 21 de outubro. A responsable de Comunicación da ONU para España e Andorra, Leticia Álvarez Reguera, achegará ao alumnado a realidade profesional das institucións internacionais coa sesión ‘Traballar nas Nacións Unidas e nas Organizacións Internacionais’.
A proposta pretende complementar a formación do alumnado de Relacións Internacionais cunha análise da evolución das Nacións Unidas, a gobernanza global, os Obxectivos de Desenvolvemento Sostible e o peso crecente de Asia na configuración da orde internacional.
