A tradición da regueifa será protagonista este venres en Neda, desta volta a través da gran pantalla. O ciclo municipal de cinema documental continúa coa proxección de ‘Ao son da nova regueifa’, un audiovisual que percorre Galicia para descubrir como esta expresión da tradición oral mantén a súa vitalidade e atopa novas formas de conectar coa creación contemporánea.
A sesión terá lugar na Casa da Cultura de Neda, ás 20:30 horas, e chega ao municipio dentro do programa ‘Outono das artes’ da Deputación da Coruña. O documental está dirixido e escrito por Manolo Maseda e Saúl Rivas.
Diferentes xeracións poñen voz ao presente da regueifa
‘Ao son da nova regueifa’ constrúe un retrato desta práctica baseada na improvisación en verso, na capacidade de resposta e nunha disputa dialéctica na que o humor e a ironía adquiren un especial protagonismo.
A película percorre diferentes puntos de Galicia e reúne as voces de regueifeiras e regueifeiros de distintas xeracións e territorios. A través dos seus protagonistas, a produción amosa a evolución dunha manifestación da cultura popular que conserva as súas raíces mentres se adapta a novos contextos e públicos.
Desde a Deputación da Coruña destacan precisamente esa conexión entre pasado e presente, cunha obra que permite comprobar como a improvisación oral funciona como punto de encontro entre a tradición e as novas formas de creación.
A proxección está aberta ao conxunto da veciñanza e diríxese especialmente ás persoas interesadas na cultura popular galega e na tradición oral.
A chegada do documental coincide, ademais, coa programación impulsada polo Concello arredor do Día do Orgullo Neofalante, que se celebra o 1 de outubro. Entre as propostas previstas figura tamén ‘Quen inventou o rap?’, espectáculo da regueifeira Lupe Blanco destinado ao alumnado do IES Fernando Esquío.
Neda reforza deste xeito durante estes días a presenza da regueifa na súa programación cultural e de dinamización lingüística, achegándoa ao público desde dúas perspectivas diferentes: a audiovisual e a actuación en directo.
