Do purgatorio convertido nunha cancha de baloncesto a unha tenda de remedios naturais que agocha poderes máxicos, pasando por unha aventura na que protexer un compañeiro resulta imprescindible para sobrevivir. Son os tres universos creados por estudantes do Campus Industrial de Ferrol que estes días se presentan ante o público e os profesionais da industria do videoxogo en Barcelona.
A Universidade da Coruña (UDC) participa desde este venres 9 ata o domingo 11 de outubro na primeira edición do SAGA Barcelona Game Fest, que se celebra no recinto Fira de Barcelona Montjuïc. No seu expositor, as persoas asistentes poderán visualizar os tráileres e probar as demostracións xogables de tres proxectos desenvolvidos no máster en Deseño, Desenvolvemento e Comercialización de Videoxogos da Escola Politécnica de Enxeñaría de Ferrol (EPEF).
Os títulos, creados como Traballos Fin de Máster (TFM), permiten mostrar o traballo realizado polo alumnado nun encontro que reúne estudos, profesionais e proxectos de diferentes países.
Baloncesto contra demos e unha tenda de remedios máxicos
Unha das propostas máis singulares é ‘Purgatory Hoops’, desenvolvido por Ecliptika Collective. Trátase dun videoxogo de disparos en primeira persoa no que a arma principal non é unha pistola, senón unha pelota de baloncesto.
O obxectivo consiste en sobrevivir a sucesivas hordas de demos nun partido ambientado no purgatorio ata conseguir chegar ao enfrontamento final contra o diaño.
A mecánica combina combates por roldas, puntuacións, diferentes tipos de lanzamentos e movementos especiais. Ademais, a cancha modifica a súa aparencia segundo avanza a partida e permite adquirir melloras para o personaxe entre fases.
O equipo responsable está formado por Jacobo Lata Espiñeira, Hugo López Permuy, Irene Lorenzo Rodríguez, Jean Luis Manay Gutiérrez, Aarón Mera González, Brais Morgade Valcárcel e Manuel Otero Rivera.
Moi diferente é a experiencia que ofrece ‘Néboa’s Hut’, creado por Conxuro Studio. Neste caso, o público atoparase cunha aventura narrativa na que deberá vender remedios naturais sen permitir que a clientela descubra os poderes máxicos da persoa protagonista.
A acción desenvólvese en tres espazos: o mostrador, onde se atenden os pedidos; o caldeiro, no que se preparan os remedios; e o xardín, onde se recollen os ingredientes necesarios.
O proxecto combina gráficos en dúas e tres dimensións e está asinado por Iago Fernández Garrido, Marcos Filgueiras Baamonde, Diego Cordero Contreras, Iván Ernesto Iglesias Pena e Marta Victoria Moreno González.
Unha aventura na que sobrevivir depende de protexer a outro personaxe
O terceiro título que viaxou desde Ferrol ata Barcelona é ‘Splash on Contact’, desenvolvido por True Encore.
A proposta sitúa o xogador ou xogadora nunha aventura de acción con perspectiva isométrica na que debe avanzar por diferentes escenarios mentres protexe e escolta un compañeiro.
Os niveis están organizados en salas interconectadas nas que poden aparecer inimigos e producirse emboscadas. A supervivencia do acompañante convértese así nun elemento fundamental para continuar avanzando.
Detrás deste proxecto están Diego Tabas Costa, Ángel Quintero Montes, Liany Mederos Pérez, Sara Buedo Fernández e Álvaro García Peña.
Os tres videoxogos poderán probarse no espazo da Universidade da Coruña durante as tres xornadas do festival.
Un escaparate internacional con máis de 200 videoxogos independentes
A primeira edición do SAGA Barcelona Game Fest nace da unión de tres eventos vinculados á industria: SAGA Saló del Gaming, Barcelona Game Fest e RetroBarcelona.
O encontro ocupa 14.000 metros cadrados e reúne proxectos e estudos procedentes de máis de 35 países, cunha programación que supera os 200 videoxogos independentes e os 500 puntos de xogo.
A oferta inclúe tamén unha zona dedicada aos videoxogos clásicos con máis de 150 máquinas recreativas, competicións de deportes electrónicos, experiencias de realidade virtual, exposicións, conferencias e obradoiros.
Xunto á vertente aberta ao público, o festival incorpora unha área profesional na que están previstas arredor de 1.500 reunións de negocio.
Ademais, o programa Talent Dev Day busca conectar empresas da industria con estudantes e persoas recentemente tituladas, abrindo un espazo de encontro entre a formación académica e o mercado laboral.
A participación da Universidade da Coruña permite que os proxectos desenvolvidos nas aulas do Campus Industrial de Ferrol cheguen a un escaparate internacional, onde o alumnado pode mostrar as súas creacións e entrar en contacto coa realidade profesional do sector.
