A lingua galega converterase este sábado en materia de xogo para os máis pequenos en Neda. A Biblioteca Municipal acollerá ás 12:30 horas o contacontos ‘Onde nace a lingua’, unha proposta participativa de Marta Ortiz que empregará adiviñas, trabalinguas, historias rimadas, música e lingua de signos para achegar o idioma ao público infantil.
A actividade forma parte da programación organizada polo Concello arredor do Día do Orgullo Neofalante, unha celebración que busca incorporar novos falantes e ampliar os espazos nos que se emprega o galego.
A entrada será libre e a proposta está recomendada para nenos e nenas a partir dos 3 anos.
A tradición oral convértese nun xogo para descubrir o galego
‘Onde nace a lingua’ parte dos recursos da tradición oral para crear unha experiencia na que as crianzas non serán simples espectadoras. O obxectivo é que xoguen co idioma e se acheguen ao patrimonio cultural galego dunha maneira lúdica e participativa.
Adiviñas, trabalinguas e contos rimados servirán para favorecer tanto os primeiros contactos co galego como para reforzar o seu uso entre aqueles nenos e nenas que xa o empregan.
O espectáculo nace da colaboración entre a narradora oral Marta Ortiz e o filólogo Brais Gutiérrez. A proposta incorpora tamén cancións de mans, contos acompañados de lingua de signos e diferentes elementos musicais.
A cita completa a programación promovida estes días polo Concello de Neda con motivo do Día do Orgullo Neofalante, coa que se pretende poñer en valor o galego e favorecer o seu uso entre as novas xeracións.
A actividade conta co apoio da Consellería de Cultura, Lingua e Xuventude a través da liña de subvencións destinada a iniciativas de dinamización lingüística.
